交運會簡報+民意收集

北區區議會啱啱喺11/05/2020舉行交通事務委員會,想同大家做番個簡單嘅匯報。

1. 聯和墟來往粉嶺南的小巴501A/K,其班次問題一直為街坊垢病。為解決小巴咁有「個性」嘅班次時間,眾議員們提出引入巴士線,以加強競爭和脫班罰則,從而改善小巴服務質素。

2. 黨鐵將於今年年中開始將12卡車廂轉做9卡,各議員都要求港鐵做好配套,將影響減至最少。(其實大家一早罷撘咗)

3. 自蓬瀛仙館旁嘅公眾停車場被政府收回起樓後,粉嶺南嘅違泊問題日益嚴重。當然好多車主都喺因為無車位故無奈泊街。阿偉同其他議員均要求盡快喺粉嶺南一帶加建多層停車場,當中包括大型嘅商用車泊位。

會議上路政署建議:花都至華明一段巴士上蓋天橋嘅中間位置加設升降機,方便有需要人士。阿偉向有關方面反映相關地面位置路面較短,工程時路面安排要做好;日後升降機燈光需調教合適光度,以免影響大家晚間作息。

然而會上討論時,華明區區議員表達升降機嘅使用以花都華心居民為主,而華明居民使用率則較少。所以想做個簡單嘅民意收集,問吓大家對於升降機設立的意見,方便我哋議員同部門有更好嘅協調。以下開放討論~

#馬拉松式開會
#0930-1700

==============
Facebook:北區藍圖-張浚偉
電話:5574 6882
電郵:cheungchunwaioffice@gmail.com
議辦地址:粉嶺華心邨華勉樓對出地下2號