區選感言

抱歉要處理謝票和籌備上任之後嘅工作,感言來遲了。

依一年真係發咗一場夢,夢嘅開始喺花都華心天橋。

記得2018年8月我地幾人,拉住車仔,帶住幾十本書,咁就開始第一次落區做漂書街站,而地點就係花都華心天橋,開始依個旅程。

之後我地有更多嘅嘗試,開流動辦事處、量血壓、新年寫揮春同聯署反對警暴等。開始時寂寂無名,仲比人問邊間教會。到咗六月,香港經歷巨大轉變,我地需要進行選舉協調,兩件事件一同出現,我地都提醒自己唔好自亂陣腳;最後協調順利完成。在反送中的參與上我地都尋找到自己嘅位置。再係區內搵議題及努力接觸最多的街坊,到九月我地漸上軌道,直到24號派成績表。特別要多謝過去助選團咁多位義工:朝早或者放工後陪我開街站;幕後幫手寫文宣同設計,有你地同行,我先可以走到今日,實在無以為報。

回想依一年,能夠步梁天琦的步伐去參選並當選,實在感到不可思議。同時想起佢同大量手足身陷囹圄,我知道今屆區議會不只是做區,如何支援一班手足更是我地要正視嘅問題。市民對「區佬」的想像和期望也有很大轉變,希望我地提出論述,香港應該如何走下去。我地會嘗試係依4年時間,希望係做區同時,提出一份香港藍圖。

連接華都的粉嶺南友好素人張正皓亦順利當選,我地會好好合作,聯手處理區內問題。

最後票數為5288票,每一票都係街坊表達對我嘅支持同肯定,感謝大家用手上的一票,助我達成進入議會的願望,衷心多謝大家。

依一年真的有點累,請大家容我休息一會,然後繼續為大家關注各種議題。2020年1月1日上任之時,我會為大家搏盡!

嚟緊4年多多指教